சில்மிச இரவுகள்

முடிச்சவிழ்ந்த கைலியின் இளகலில்
அவள் உள் நுழையும் கனவினில்
பின் இரவு கரையக் கண்டேன்
உக்கிர கோடையில் வழியும் அவள் வியர்வையில்
கமழும் நறுமண மலர்களின் வாசம்
நாசியின் அடிவரை நுழைந்து
இதயத்தின் இடம் வலம் தொடும்
சொப்பன சுந்தரியின் வனப்புகளில்
தாவித் திரியும் அவாவின் அலைவுகளில்
தொலைத்த வினாடிகளின் தொகுப்பே
எனது வாழ் காலத்தின் கணக்காகிறது
முன் மாலைப் பொழுதின் இரம்மிய அழகை
விழுங்கத் துடிக்கும் சர்ப்பத்தின் நாக்கில்
மேனகையின் மோகமுகம்
என்னைக் காமத்தின் சொர்க்கத்துள் தள்ளி விடுகிறது
சிலிர்த்தடர்ந்த பூஞ்சோலையாய்
அவள் உதிர்த்து விட்டுப்போன புன்னகையில்
மயிலிறகின் வருடல்
உடல் முழுதும் சில்மிச நடனம் புரிகிறது
இரவு கடந்து வெகு நேரமாகியும்
கலையாத அவள் முகம்
என் நினைவுக் குழியினுள்
கனவுகளைத் தேக்கியபடியே
புயல் கடந்துபோன தேகத்தின் அயர்ச்சியில்
மூர்ச்சையாகிக் கிடக்கிறது எனதுடல்.